صفي فؤادك وإرحمه… الاديبة سميرة محمودي
صفي فؤادك وإرحمه
سميرة محمودي
صفي فؤادك وإرحمه
وعلى الأصيل نادي
دا الندل ممكن يبيعك
او يخسرك عادي
متخفش ظلمه
وحاول تبعد الخطوة
دا الحق عل اللي سبق
والظلم عل البادى
__________
كان اول المنعطف
واخد الهوى قوة
بالغصب عنك سكن
ف القلب من جوة
شريان حياتك نبض
بالعشق حبيته
والعشق لما نطق
اول ما قال هو
مديت له إيدك أمل
مع بكرة يتدور
بدرالتمام في السما
من مهجتك نور
حكى للنجوم قصتك
راحت معاك لبعيد
حتى النجوم عرفتك
ع الاصل بتدور
صبيت له كاس الهنا
يشرب ويتهنا
زينت ليل الهوى
بالعطر والحنة
فتحت له الأبواب
يتملى من نورك
وسمحتلوا بترحاب
يتمشى ف قصورك
قلبك دا ولا ملك
نازل من الجنة
عاهدته عهد الوفا
والصدق مهما يكون
والوعد عاش بالصفا
عمرك في يوم ماتخون
في البعد كات خطوته
مهما تغيب جارك
لكنه طبعه كدة
عاشق يقيد نارك
يطفي شموع الفرح
والبهجة والانوار
لو كان بينوى البعاد
طب ليه بيختارك.
كان طبعه بعد الهوى
يسحب هواه بشويش
ويكون ضباب ف السما
ظاهر لكنه مافيش
ايه يعني لما تغيب
م الدنيا ع الهادي
تشبع بجرحك بكا
وتسيبه هو يعيش
ونهاية المنعطف
سوء اختيارك موت
وصرخة تحكي الألم
للكون وللملكوت
والجرح ينزف ندم
ع اللي انت صنته زمان
ياللي اختيارك غلط
لازم تموت مكبوت
___________
ربما تحتوي الصورة على: شخص واحد، وجلوس